我係現役消防員,講既野不能代表曬整個消防處人員,但亦係不少處方人員既心聲。

見到五大紀律部隊首長聯合聲明和三個消防工會發表聯合聲明。我想講,我地好多高層係藍絲,但好多基層都係黃絲,所以我唔認為佢地能夠代表曬全部消防人員既立場。

我唔認為示威者係暴徒,我係一個和理非,我不能完全同意示威者既行為,但我理解點解佢地要咁做,而且絕不割蓆。佢地既行動係針對呢個與民為敵既政府同埋同呢個政府合作打壓市民既財團公司。

尋日政府宣佈要硬推禁蒙面法之後,多區開花,而我地都一直忙到差不多零晨1點。我去過幾個現場,有示威者會阻止我地消防車前進,但係佢地對我地係友善既,亦有示威者同我地道歉,亦有示威者對我地表示支持。當刻,見到好多年輕人,好心酸,亦好慚愧。因為即使我係支持佢地既信念,都唔可以當面同佢地講。好想同佢地講,一切要小心,Be Water。

尋晚返到局,上連登睇到好多關於消防既討論,有話應唔應該放行消防到現場救火;有話應唔應該繼續支持消防。其實,我想講示威者唔放行消防車,我地唔會強行闖過,亦都唔會阻礙示威者現場做緊既野,但因為職責關係,就算步兵,都要到一到現場睇下,怕有人命傷亡。我地既天職係救人救火,保護生命同財產。所以,確保現場人仕既生命安全係我地既首要目標。


以上所講,唔係想賺取示威者繼續在現場向我地歡呼或道歉,我不需要,亦唔夠資格,亦不及示威者勇敢。只係希望佢地明白我地都只係職責所在。

最後,我想講
年輕人一定要小心,Be Water
光復香港,時代革命
煲底相見

以上內容皆為轉發,資料未經確實,只供備份參考。

上述內容並不代表本站立場
來源:潘小濤FB

Loading...