雨僑與羅力威於今年3月結婚,七年愛情長跑修成正果,婚前婚後一樣咁恩愛~

噚晚雨僑、鄧兆尊、胡杏兒、盧海鵬等喺灣仔出席「飲食天王頒獎典禮」,杏兒擔任頒獎嘉賓,做咗人妻之後,間唔中都會落廚,佢話:「中餐西餐都有拿手菜,反而最鍾意向難度挑戰,家常小菜冇乜難度,煮得好有成功感,會畀老公試食,老公唔會隱瞞,好唔好食都會直接表達,無論咩意見我都接受。」
同場嘅兆尊話三、四個月前,開始同朋友一齊做茶餐廳生意,而自己對食係冇乜嘢要求,周街搵食。問到佢幾位紅顏知己識唔識煮嘢食?兆尊笑稱:「實不相瞞,佢哋每個人只係煮過一餐,因為煮嘢食好辛苦。啲街坊好好人,去買餸時畀好多份量我哋,所以都係寧願出街食。我都會煮,都係一年一餐一齊食。」
講到之前有報道話,鄧家喺西貢一幅地申請更改建築用途,兆尊話:「我唔清楚,通常細佬兆榮負責,冇所謂,只係畀多個選擇人哋,都唔係咩大件事。」
而雨僑就話最近訓練老公羅力威煮嘢食:「o依家佢識煲粥、炒菜,平時我哋會喺屋企做音樂,好多時喺屋企整嘢食,老公本身係唔識煮。」

係咪想訓練老公成為「黃面公」?雨僑一聽就笑:「唔係,其實我想訓練佢做陪月。」咁講,唔通有咗?「未呀!之前結婚時佢負責搞婚禮,fans形容佢為力威wedding planner,fans叫我訓練佢做陪月,變成『力威月子中心』,等佢接手做到陪月,我至生B,互相照顧。」真係好有planning喎!
(Apple daily)
Loading...